أكلات فراخ : طبخه كاملة في البيت تغنيك عن أكل المطاعم
الفراخ وجمالها تيجي نعمل مع بعض فراخ بطريقه مختلفه شويه منها مختلفه ومنها بسيطه جدا ومنها كمان هتعملي عليها اصناف طبيخ يكفي معاكي ل عيله كامله بمكونات سهله ومتوفره معاكي ف مطبخك وهتبقي طعم مفيش بعد كدا وريحه مفيش اجمل من كدا هنبدأ مع بعض ب مكونات الطبخه بتاعتنا.
المكونات
- فرخه مقطعة (زي ماتحبي)
- حبهان (هيل)
- ورق لورا (ورق غار)
- ملح وفلفل أسود
- بهارات فراخ
- توم مفروم
- كزبرة ناشفة (للملوخية)
- ملوخيه
- باميه
- سمنه او زبده كميه تكفي للفراخ والملوخيه والباميه
كدا المكونات جاهزه معانا
تعالي بقا نبدا مع بعض
طريقة تسوية الفراخ
- هتكوني محضره فرخه مغسوله ومتنضفه من قبل كدا
- هتجبيها وتغسليها كويس
- تجيبي حله كبيره شويه وتحطيها علي نار متوسطه وتحطي فيها:
- معلقتين سمنه
- معلقه توم مفرومه
- وتقلبي التوم لحد ما يبقي لونه دهبي
- وتنزلي بعد كدا بالفرخه المقطعه بتاعتك
- وتقلبيها مع التوم والسمنه علي نار هاديه وتسبيها خمس دقايق
- وبعد كدا تفتحي الحله بتاعتك وتديها قليبه تاني
- وتنزلي علي الفرخه بالحبهان و ورق اللورا
- والملح والفلفل الاسود
- وكمان ياسلام لو حبة فلفل اخضر بس تكون حاره
- وتشوحي كله ده مع بعضه وتسبيها دقيقه وحده
- وتنزلي بعد كدا ب الميه عليهم ويفضل لو كنتي مسخنه الميه قبل ما تحطيها
- (وزي ماتحبي برضوا)
- وتغطي الحله بتاعتك وتسبيها براحتها لحد ماتستوي
بعد اما تستوي بقا هتعملي ايه، تجيبي صينيه تكفي الفرخه وتطلعي الفرخه فيها ، وتبلي الفرخه بتاعتك كمون وكزبره وفلفل اسود وبهارات فراخ وسبيها علي جنب لحد مانحتاجها
طريقة عمل الملوخية الخضراء بالشوربه
نرجع بقا لشوربة الفراخ اللي بقيت عندي هنعمل عليها احلي طبق ملوخيه وباميه
طريقة عمل الملوخيه الاول بشوربة الفراخ
- هتجيبي حبه حلوين من الملوخيه الخضره
- وتقرطفيهم وتغسليهم كويس اوي
- وتصفي الميه منهم كويس وتسبيهم خمس دقايق
- لحد ما ينشفوا معاكي من الميه
- وبعد كدا تفرميهم ب الطريقه اللي تحبيها
- وبعد كدا تحضري حله صغيره وتحطي فيها
- معلقة سمنه
- حبة توم مفرومه
- حبة كزبره ناشفه
- وشويه ملح صغيرين
- وقلبي بقا دقيقتين بس علي نار هاديه كمان
- وياريت بلاش التوم يلون منك جامد علشان هيأثر علي لون الملوخيه
- وانزلي بعد كدا ب شوية شوربه وسبيها لحد اما تفور
- وانزلي بعد كدا ب شوية الملوخيه المفرومين عندك
- وايدك متبطلش تقليب دقيقه وطفي النار عليها
- وبرضوا قلبي فيها بعد اما طفيتي النار لحد ما تفك معاكي
وكدا يبقي طبق الملوخيه جاهزه وب الف هنا
طريقة عمل البامية بالدجاج
نرجع بقا لباقي الشوربه نستفيد بيها بقا، نعملوا طبق باميه كمان.
- هتجيبي شويه باميه خضره واغسليهم
- وقلميهم كويس وقطعيهم
- وتكوني مجهزه حله صغيره
- حطي فيها شويه شوربه وحطيها علي النار لحد ماتسخن
- انزلي بعد كدا ب الباميه اللي قطعتيها علي الشوربه
- وضيفي شوية ملح وحبة توم مفرومين
- واول ما الشوربه والباميه تفور نزليهم من علي النار
- وافرميهم ب اي طريقه تفضليها
- سواء الخلاط اليدوي او اي حاجه عندك
- بعدها تكوني حضرتي الطاسه وحطيتي فيها
- معلقة السمنه
- وحبة توم مفرومه
- وكمون وملح وفلفل
- وشوحيهم مع بعض لحد ما لون التوم يبقي دهبي
- انزلي بيهم علي حلة الباميه اللي سوتيها
- ورجعي الحله علي نار هاديه دقيقه وحده
- وقلبيهم مع بعض وطفي النار عليهم
وكدا يبقي الباميه بتعتك استوت وب الف هنا
طريقة عمل الأرز بالشعرية بالمقادير
السفره بتعتك ناقصها طبق رز ب الشعريه، علشان الاكله تبقي كامله، تيجي نعمل مع بعض طبق رز ب الشعريه
المكونات
- كوبايه رز
- نصف كوبايه شعريه
- معلقه كبيرة زبدة أو زيت
- (ولو الاتنين مع بعض يبقي احلي بكتير )
- ملح
- وبهاراتك الحلوه اللي بتحبيها
- كوبايه ونص ميه او شوربه (ممكن اكتر علي حسب نوع الرز )
كدا المكونات بقيت جاهزه نيجي بقا للطريقه بتاعتنا.
طريقة التحضير
- جيبي حله وحطي فيها معلقة الزيت ومعلقة السمنه
- وحطيهم علي النار لحد ما يسخنوا كويس
- اغسلي الرز وصفيه كويس
- وانزلي بنص الرز ف الحله وقلبي كويس لحد اما لون الرز يبقي دهبي
- وانزلي بعد كدا ب الشعريه وقلبيهم مع الرز
- لحد اما لون الشعريه يبقي دهبي غامق
- انزلي بقي بباقي الرز وقلبي دقيقتين
- حطي بقا الميه او الشوربه وقلبي
- حطي الملح والبهارات بتاعتك
وسبيهم علي نار هاديه لحد ما يستوي، نزلي الرز من علي النار وكدا يبقي الرز كمان بقي جاهز.
.webp "تحمير الفراخ و تجهيز السفرة")
تحمير الفراخ و تجهيز السفرة
.webp "تحمير الفراخ و تجهيز السفرة")
- ارجعي معايا للفراخ اللي سوناها وتبلناها.
- تعالي نحمر الفراخ مع بعض.
- جيبي طاسه وحطي فيها معلقتين سمنه.
- وحطيها علي النار.
- واما تسخن انزلي ب الفراخ لحد مايبقي لونها ذهبي.
- طلعي الفراخ من الطاسه
- وكدا تبقي جهزت الفراخ
وبقي معاكي احلي وجبه تكفي عيله كامله وبالف هنا علي قلبك
