طريقة عمل المكرونة: 4 وصفات مكرونة لذيذة وسريعة
المكرونه اكله سهله وبسيطه ولذيذه كمان، وجمال المكرونه ان ليها كذا طريقه واكتر من وصفه، هنا بقا هنتعلم مع بعض الوصفات المختلفه لطريقة طهي المكرونه المفلفله والمكرونه بالحليب والمكرونه بالصلصه.
طريقة عمل المكرونة باللبن بدون فرن
المكونات
- كوبايتين مكرونه صغيرة (اوأي نوع تفضليه)
- كوبايتين لبن
- كوبايتين ميه
- معلقة صغيرة ملح
- مكسرات (ودا اختياري)
وكدا المكونات خلصت
طريقة التحضير
جيبي وعاء وحطي فيه الميه وحطيه علي نار متوسطه لحد ما الميه تغلي ضيفي حبة الملح، انزلي عليهم ب المكرونه وقلبيهم مع بعض وسبيها علي نار هاديه، لحد ماتقرب تستوي، بعد كدا صفي المكرونه وسبيها علي جنب جيبي كمية اللبن اللي عندك وحطيها في وعاء صغير، وحطيه علي نار هاديه لحد ما اللبن يسخن.
اخر خطوه هي خلط المكرونه مع الحليب
جيبي وعاء كبير وضيفي المكرونة المسلوقة و الحليب فيها وحطيها علي نارهاديه واستمري في التحريك خمس دقايق لحد ما تتشرب المكرونة مع الحليب وكدا يبقي المكرونه ب اللبن جاهزه، اخر حاجه اسكبي المكرونه ب اللبن ف طبق وممكن انك تحطي عليه مكسرات وسكر وممكن تستغني عن الخطوه دي وكدا يبقا خلصت وصفتنا بالف هنا
أفضل طريقة لعمل المكرونة المفلفة
مكوناتها
- ربع كيلو مكرونة (أي نوع تفضليه)
- معلقتين زيت
- معلقة سمنه
- ملح وفلفل أسود
- كوبايتين ميه او شوربه(قابل للزياده علي حسب نوع المكرونه)
- بهاراتك الجميله (مثل الكمون أو الكزبرة الناعمة)
- حبة فلفل اخضر مفرومين
- حبة طماطم مفرومه
وكدا المكونات خلصت نيجي بقا للطريقه
طريقة التحضير
جيبي وعاء وحطي فيه معلقتين الزيت ومعلقة السمنه وحطيها علي نار متوسطه اول ما تسخن، انزلي ب المكرونه وقلبي كويس واستمري ف التقليب لحد ما المكرونه تتفلفل ويبقي لونها دهبي غامق انزلي بعد كدا ب حبة الفلفل المفرومه وقلبي دقيقه وحده، ضيفي بعد كدا كوبايتين الميه او(الشوربه) اللي متواجد معاكي وانزلي ب الملح والفلفل الأسود والبهارات، وحبة الطماطم المفرومه عندك وسبيهم علي نار هاديه لحد ما المكرونه تستوي وكدا خلصت طريقة المكرونه المفلفله بالف هنا علي قلبك
طريقة عمل المكرونة بالصلصة زي المحلات
المكونات
- كيس مكرونة(اي نوع تفضليه)
- كوبايتين ميه (لسلق المكرونه)
- بصلة مفرومة
- معلقة توم صغيره مفرومه
- حبة طماطم مفرومين كويس
- ملح وفلفل أسود
- معلقتين كبار زيت أو سمنه
- بهاراتك الحلوه مثل الكمون الكزبره الناشفه
- حبة فلفل مفرومه
- وكدا يبقي المكونات جهزت
طريقة التحضير
جيبي حله وحطي فيها كوبايتين الميه وحطيها علي النار واول ما تبدا تسخن انزلي ب المكرونه، وحبة الملح ونقطة زيت وسبيها علي نار هاديه لحد ما تستوي، اول ما تستوي نزليها من علي النار وصفيها واركنيها علي جنب وتعالي نعمل صلصة الطماطم
طريقة التجهيز
جيبي صينيه وحطي فيها معلقتين السمنه ومعلقة الزيت وحطيها علي النار واول ما تسخن انزلي ب البصله المفرومه وقلبي لحد ما تدبل ويبقي لونها دهبي حطي بعد كدا معلقة التوم المفرومه اللي عندك وحبة الفلفل الحار وقلبي دقيقتين بس واخر حاجه انزلي ب الطماطم المفرومه وسبيها علي نار هاديه لحد ما الصلصه تتسبك ضيفي الملح، الفلفل الأسود والبهارات (الكمون والكزبره ) واول ماتتسبك ضيفي المكرونة المسلوقه للصلصة، وحركي كويس وسبيها دقيقتين علي نار هاديه مع التقليب ب استمرار وكدا المكرونه ب الصلصه جهزت بالف هنا
طريقة عمل المكرونة الحلوة بالسمن السكر
المكونات
- ربع كيلو مكرونة ( اي نوع بتحبيه)
- معقتين كبار سمنة او زبده
- 3 ملاعق كبيرة سكر (اكتر او اقل اللي بتفضليه )
- كوبايتين ميه( لسلق المكرونه)
- رشة ملح صغيره جدا
نيجي بقا للطريقه البسيطه بتاعتنا
طريقة التحضير
جيبي حله وحطي فيها كوبايتين الميه، ورشة الملح وحطيها علي النار، واول ما تسخن انزلي ب المكرونة وقلبي وسبيها لحد ما تستوي واول ما تستوي صفيها واخر حاجه جيبي طاسه حطي فيها السمنه وحطيها علي النار واول ما السمنه تدوب، ضيفي المكرونة للسمنة وحركيها لحد ما تتشرب السمنة انزلي ب السكر كمان وقلبي لحد ما السكر يدوب مع المكرونه المسلوقه ب السمنه ، وكدا وصفتنا خلصت بالف هنا
